Golden Globe-verðlaunin voru haldin í 75. skipti í gærkvöldi. Stjörnurnar sammæltust um að mæta í svörtu. Það vantaði þó ekkert upp á smartheitin þótt flestallar væru klæddar í sama lit. 

Berar axlir voru áberandi, blúndur, pallíettur og púff. Gegnsæ siffonefni og fjaðrir sáust líka víða og mátti greina nokkur áhrif frá níunda áratugnum. Rykkingar í kjólum eru að koma sterkar inn aftur og svo voru nokkrar í svörtum jakka yfir. Nú er þorrablótsvertíðin að hefjast og þetta æði er nú eitthvað sem íslenskar konur geta hæglega leikið eftir þegar þær mæta í sviðin, rófustöppuna og staupin.