Katrín hertogaynja klæddist gylltum síðkjól úr silki frá Erdem þegar hún og Vilhjálmur snæddu kvöldverð með Viktoríu krónprinsessu Svíþjóðar og Daníel eiginmanni hennar í sendiráðsbústað Breta í Stokkhólmi í gær, þriðjudag.
Katrín sem er vön að klæðast styttri kjólum sá greinilega tilefni til þess að fara í sitt allra fínasta púss fyrir kvöldverðinn en hertogahjónin eru í opinberri heimsókn í Svíþjóð. Hún skildi þó ekki stuttu kjólana eftir heima og klæddist einum slíkum frá Catharine Walker fyrr um daginn.
Erdem-kjóllinn er fallegur með fágað yfirbragð en hann mun vera úr haust- og vetrarlínu tískuhússins frá því í fyrra. Hægt er að fá blómakjólinn í svörtu á 230 þúsund íslenskra króna.