Stjörnurnar velja græna augnskugga

Litríkir augnskuggar í sterkum litum hafa verið áberandi undanfarið. Allt virðist vera leyfilegt hvort sem liturinn er rauður, blár eða grænn. Græni liturinn hefur til dæmis vakið athygli á rauða dreglinum það sem af er ári. 

Förðunarfræðingurinn Rachel Goodwin valdi grænan augnskugga fyrir leikkonuna Emmu Stone þegar hún farðaði hana fyrir Golden Globe-verðlaunin í byrjun janúar. Goodwin segir í viðtali við Allure að græni liturinn hafi verið táknrænn. 

Á meðan flestir mættu í svörtu til þess að sýna þolendum kynferðisofbeldis stuðning ákvað Goodwin að halda ekki aftur að sér þegar kom að förðuninni. Þegar hún skoðaði réttindabaráttu kvenn í kringum aldamótin 1900 kom í ljós að þrír litir voru í aðalhlutverki, grænn, fjólublár og hvítur. 

Emma Stone er þó ekki eina stjarnan sem hefur sést með grænan augnskugga. Tónlistarkonan Janelle Manae mætti á Grammy-verðlaunin með grænan farða undir augunum. Leikkonan Hailee Steinfeld mætti einnig með mikinn grænan augnskugga á Grammy-verðlaunin.