Árshátíðavertíðin er að hefjast og mörg fyrirtæki bjóða upp á svæði með flottum bakgrunni og ljósmyndara. Hvernig er þá best að stilla sér upp? Stjörnurnar á rauða dreglinum eru þrautþjálfaðar í myndatökum og flestar stilla þær sér eins upp, með höndina á mjöðm.
Vinsælasta stellingin á rauða dreglinum er að staðsetja aðra höndina á mjöðm. Vilja sumir meina að fólk virðist grennra þannig, að minnsta kosti sjást línurnar vel. Sú hönd sem er á mjöðm er auk þess í spenntri stöðu svo að bingóið fær ekki bara að hanga.
Hvort sem markmiðið er að virðast grennri eða þú veist hreinlega ekki hvað þú átt að gera við hendurnar á myndum er góður valkostur að setja aðra höndina á mjöðm. Það eru ekki bara fyrirsætur sem setja höndina á mjöðm heldur líka reynsluboltar eins og Oprah Winfrey og Nicole Kidman.