Það er enn vetur en hvíti liturinn hefur samt sem áður verið áberandi á rauða dreglinum í vikunni. Stjörnurnar hafa keppst við að mæta í hvítum fötum á frumsýningar og verðlaunahóf frá því á sunnudaginn.
Fólk þarf ekki að vera sólbrúnt á Spáni til þess að ganga í hvítu þó svo að leikkonan Penelope Cruz hafi reyndar verið í Madríd þegar hún klæddist glæsilegum kjól Vercase í vikunni. Þó svo á jörðin sé hvítklædd þessa dagana á Íslandi þýðir það ekki að hvítu fötin þurfi að bíða inni í skáp eftir ferðinni til Tenerife.
Tónlistarkonan og leikkonan Mary J. Blige var flott í hvítum leðurstígvelum við hvítan kjól frá Tom Ford þegar hún snæddi hádegisverð í Los Angeles ásamt fólki sem hlaut tilnefningu til Óskarsverðlaunanna í ár. Á sama viðburð mætti leikkonan Margot Robbie í stuttum hvítum kjól frá Chanel.
Dakota Johnson mætti í hvítum kjól frá Prada á frumsýningu Fifty Shades of Freed í París. Á sömu frumsýningu mætti Rita Ora í hvítum samfesting frá Stephane Rolland.
Leikkonan Saoirse Ronan mætti í hvítum kjól frá Narciso Rodriguez á verðlaunahátíð í Beverly Hills. Leikstjórinn Greta Gerwig var þó ekki á hvítu línunni og mætti í appelsínugulum kjól með slaufu.