Hártískan gengur í hringi eins og annað. Á tískuvikunni í New York sást gamall hárdraugur í hári þeirra sem gengu fyrir Prabal Gurung. Hárgreiðslumaðurinn Anthony Turner sá um hárið á fyrirsætunum en hann vildi leyfa fötunum að njóta sín.
Um er að ræða teygjanlegan kamb úr plasti en margir áttu einn slíkan í kringum aldamótin. Elle greinir frá því að hugmyndina að hárstílnum hafi Turner fengið frá flottum stelpum í London á leiðinni í jóga.
Turner telur líklegt að þetta verði vinsælt aftur nú þar sem að Hadid-systurnar, Gigi og Bella, og Ashley Graham hafi sést með kambinn en allar þrjár eru meðal vinsælustu fyrirsætanna í heiminum í dag.