Hettupeysur eru ekki bara fyrir ungt fólk í gallabuxum eins og einhver myndi halda. Hettupeysur má nota við allt ef marka má klæðnað söngkonunnar Beyoncé og leikkonunnar January Jones í vikunni.
Á þriðjudaginn mætti Jones á tískuviðburð í Los Angeles þar em hún klæddist svartri hettupeysu, röndóttu missíðu pilsi og hælaskóm. Þrátt fyrir að klæðnaðurinn hafi eflaust verið útpældur leit Jones út fyrir að hafa skellt sér bara í fötin greitt hárið í tagl og farið út, hettupeysan gefur kæruleysislegt yfirbragð.
Aðeins tveimur dögum fyrr klæddist poppdrottningin Beyoncé afar svipuðum fötum þegar hún fylgdist með NBA-leik. Varð gult ósamhverft pils frá Jacquemus fyrir valinu, brún hettupeysa frá JW Anderson og auðvitað hælaskór.