Leikkonan Rita Moreno mætti á ókarsverðlaunahátíðina í sama kjólnum og fyrir 56 árum. Árið 1962 vann Moreno Óskarinn fyrir bestan leik í aukahlutverki fyrir hlutverk sitt í West Side Story.
Pilsið á kjólnum var það sama en búið var að breyta efra stykkinu. Kjóllinn er greinilega klassískur og hefur elst vel þrátt fyrir að hafa verið notaður fyrst árið 1962.
Vanity Fair greindi frá áformum Moreno eftir að dóttir hennar, Fernanda Luisa Fisher, greindi frá þeim á æfingu fyrir verðlaunahátíðina. Leikkonan staðfesti áformin síðan á Twitter.
Moreno, sem er orðin 86 ára, hefur ekki bara unnið Óskarinn heldur líka Emmy-, Grammy- og Tony-verðlaunin sem þykir nokkurt afrek.