Veitingahúsamaðurinn Gunnsteinn Helgi Maríusson leggur mikið upp úr fatastílnum hvort sem hann er heima eða í vinnunni. Hann sér til dæmis um að starfsfólk hans sé vel klætt og hefur til að mynda keypt pelsa á starfsfólk sitt á barnum Pablo Discobar.
Hvernig myndir þú lýsa fatastílnum þínum?
„Einfaldur, 95% af fötunum mínum eru einlit svört eða hvít. Fataskápnum er skipt í tvennt, hvít föt vinstra megin og svört föt hægra megin. Ég á fáar flíkur, en bara góðar flíkur,“ segir Gunnsteinn.
Hvað kom til að þú keyptir pelsa á allt starfsfólkið?
„Pablo Discobar er ekki bara bar sem selur frábæra kokteila, að koma á Pablo er heildarupplifun. Að ganga upp stigann er eins og að fara aftur í tímann og þegar upp er komið er maður kominn aftur til 1978, klæðnaðurinn, tónlistin og hamingjan frá þessum tíma er stór partur af upplifuninni. Barþjónar Pablo eru allir í late 70’s tískunni og allir eiga sinn pels. Við erum einnig búnir að kaupa Pablo-gallajakka á alla barþjónana til að nota í sumar þegar verður of heitt fyrir pelsana
Hvað er það við pelsa sem heillar?
„Pelsar voru mjög vinsælir á diskótímanum og allt við það tímabil heillar. Við erum einnig að opna í sumar annan bar sem mun heita Bar Miami og þar fá allir starfsmenn sérhannaða hvíta blazer-jakka og ósýnilega sokka.“
Áttu þér tískufyrirmynd?
„Nei, engin sérstök tískufyrirmynd. Sæki frekar innblástur í hin ýmsu tímabil og fæ innblástur úr gömlum bíómyndum.“
Hvaða flík er í uppáhaldi?
„Það eru tvær flíkur sem ég nota langmest, ætli þær séu ekki í uppáhaldi. Gucci-jakki sem ég nota alltaf í vinnunni sem er með ísaumuðum drekamynstrum & Burberry-rykjakki sem ég er mestmegnis í þegar ég er ekki að vinna.“
Hvaða verslanir eru í uppáhaldi?
„Ég versla mest í GK hérlendis og Burberrys og Gucci erlendis.“
Hvað gerir þú við föt sem þú ert hættur að nota?
„Gef bræðrum mínum og Rauða krossinum.“
Hvað kaupirðu þér alltaf þó svo að þú eigir nóg af því?
„Sokka.“
Nýjasta flíkin í skápnum?
„Svört rúllukragapeysa sem ég keypti í Húrra.“
Bestu kaup sem þú hefur gert?
„Klassískar svartar gallabuxur eru bestu kaup sem hægt er að gera, passa við allt og alltaf.“
Hvað er á óskalistanum fyrir sumarið?
„Skór.“