Dorrit bauð vinkonum sínum í boð

Dorrit Moussaieff fyrrverandi forsetafrú Íslands var gestgjafi í glæsilegu boði sem íslenska húðvörumerkið Bioeffect hélt í New York á dögunum. Merkið er selt í öllum betri verslunum um allan heim og eru fáir betri en Dorrit til að kynna það því hún hefur notað húðdropana frá upphafi. Nú eru Bioeffect vörurnar komnar inn í Bergdorf-Goodman í New York. 

Veislan var liður í að kynna Bioeffect frekar fyrir bandarískum neytendum, en fyrirtækið herjar nú á Bandaríkjamarkað af fullum krafti. Dorrit Moussaieff hefur notað vörur frá Bioeffect frá upphafi og er meðal annars sérstakur aðdáandi 30 Day Treatment vörunnar. Því þótti vel við hæfi að leita til hennar og fá hana í þetta markaðssamstarf.

Dorrit bauð þrjátíu af sínum nánustu vinkonum sem eru jafnframt meðal áhrifamestu kvenna New York-borgar. Þar má nefna sjónvarpsfréttakonuna Mariu Bartiromo sem er með sinn eigin þátt á sunnudagsmorgnum á Fox News, Jennifer Stockman forstöðukonu Guggenheim-safnsins, Avril Graham, tískuritstjóra Harper‘s Bazaar, og Debru Black, Broadway-leikstjóra sem hefur unnið til fjölda Tony-verðlauna á ferli sínum.

Bergdorf Goodman er ein af elstu og þekktustu stórverslunum New York, en hún var stofnuð árið 1901 af Herman Berfdorf og Edwin Goodman. Hún er til húsa í tilkomumikilli byggingu efst á 5th Avenue, rétt við Central Park. Það er mikil ásókn í að komast þangað inn með ný vörumerki og færri komast að en vilja. BIOEFFECT-vörurnar fengu þó strax góðar viðtökur og fóru í sölu hjá þeim í október á síðasta ári. Síðan þá hafa viðskiptavinir verslunarinnar einnig tekið þeim fagnandi.

Hádegisverðurinn var haldinn í glæsilegum sal inn af veitingastað á sjöundu hæð stórverslunarinnar. Matseðillinn samanstóð af ofnbökuðum íslenskum þorski og Siggi‘s Skyr með ferskum berjum. Auk þess var á borðum íslenskt vatn og súkkulaði úr smiðju Omnom.

Björn Örvar, einn stofnenda ORF Líftækni og framkvæmdastjóri rannsókna og nýsköpunar, hélt stutta kynningu um sögu BIOEFFECT og vísindin á bak við vörurnar. Líflegar og skemmtilegar umræður sköpuðust því konurnar voru greinilega afar áhugasamar um þessar einstöku vörur. Að hádegisverðinum loknum voru gestir leystir út með fallegum BIOEFFECT gjafapoka.