Að klæðast gallabuxnaefni við meira gallabuxnaefni (e. denim on denim) er eitthvað sem kemur ekki alltaf vel út. Fatahönnuðurinn og fyrrverandi kryddpían Victoria Beckham átti þó ekki í stökustu vandræðum með að láta tískufyrirbrigðið ganga upp.
Frú Beckham sást skarta flottri gallabuxnadragt úr dökku gallbuxnaefni á dögunum. Gallabuxurnar sjálfar voru níðþröngar, síðar og örlítið útvíðar og þannig þær náðu vel yfir hælana sem hún var í. Dressið var að sjálfsögðu hennar eigin hönnun en Beckham er dugleg að auglýsa fyrir sjálfa sig.
Buxnadragtir hafa verið vinsælar í vor og eru greinilega fremst í fataskápnum hjá Beckham þessa dagana. Nokkrum dögum eftir að hún sást í gallabuxnadragtinni birti hún mynd af sér í svartri buxnadragt. Reyndar var móðir hennar einnig klædd í svarta buxnadragt.