Þær fréttir berast nú af tískuvikunni í Kaupmannahöfn að tískumerkið Ganni, sem er mjög vinsælt á Íslandi, og 66°Norður séu komin í samstarf. Um er að ræða línuna Paradis sem inniheldur þrjá jakka og eitt vesti.
Var línan kynnt á tískusýningu Ganni fyrir sumar 2019 í Kaupmannahöfn fyrir stuttu. Nett 90's áhrif eru í línunni sem kemur ekki á óvart því þannig er bara tískan í dag.
„Ég elska að vinna með andstæður, það er hluti af okkar DNA, og það að vinna með 66°Norður við að búa til tæknilegan fatnað úr tæknilegum efnum gefur sumarlínu okkar skemmtilega og nýja vídd,“ segir Ditte Reffstrup, listrænn stjórnandi Ganni.
Fötin verða fáanleg hjá 66°Norður og Ganni. Á Íslandi fæst Ganni í Geysi. Hægt er að sjá línuna í Story á Instagram-síðu Ganni.