Vogue hættir að ráða fyrirsætur yngri en 18 ára

Tískutímaritið Vogue hefur gefið út að það ætli að hætta að ráða fyrirsætur sem eru yngri en 18 ára í myndatökur. Ákvörðunin er hluti af nýrri stefnu Vogue að berjast á móti óraunhæfum fegurðarstöðlum. Þetta er útskýrt í færslu á síðu Vogue. 

Þar segja fyrirsætur sögu sína frá því að þær voru aðeins ólögráða táningar. Ungar stúlkur eru oft ráðnar sem fyrirsætur þegar þær eru aðeins 13-14 ára. Þær eru teknar inn í tískuheiminn án þess að vita hvað þær eru að fara út í og enda oft á því að vinna 20 tíma á sólarhring. 

Fyrirsæturnar eru vinsælastar þegar þær eru ungar og ekki orðnar kynþroska. Þegar þær verða svo kynþroska, fá mjaðmir og brjóst, missa þær vinnuna því þær passa ekki lengur í fötin sem þær eiga að sitja fyrir í eða sýna á tískupöllum. 

David Bonnouvrier, stofnandi DNA Model Management í New York, segir að hér áður fyrr hafi tekið lengri tíma að sérsauma fötin á fyrirsæturnar. Nú sé þróunin hins vegar sú að tískuhús vilji 40-50 fyrirsætur í hverja sýningu. Það taki því allt of langan tíma að tryggja að fötin passi fyrirsætunum. „Núna eru stelpurnar ráðnar til að passa í kjólinn. En veistu hvaða konur passa bara í þessar litlu stærðir? Unglingar. Stelpur sem hafa ekki enn þá tekð út þroska,“ segir Bonnouvrier.

Þótt Vogue hafi ákveðið að breyta um stefnu til að berjast á móti óraunhæfum fegurðarstöðlum viðurkennir það að hafa ýtt undir þessa óraunhæfu staðla lengi. „Ekki meira: Þetta er ekki rétt af okkur, þetta er ekki sanngjarnt fyrir lesendur okkar og þetta er ekki rétt fyrir ungar fyrirsætur, að berjast um að komast á þessar síður. Þótt við getum ekki endurskrifað söguna getum við reynt að gera framtíðina betri,“ stendur í færslu Vogue.

Beyoncé prýðir forsíðu bandaríska Vogue í september.

• Blogga um frétt