Frumsýning kvikmyndarinnar „Crazy Rich Asians“ var full af „Crazy Rich“-kjólum í Hollywood á dögunum. Kvikmyndin verður frumsýnd í Sambíó föstudaginn 24. ágúst næstkomandi og er beðið eftir henni með spenningi.
Kvikmyndin er byggð á samnefndri metsölubók sem kom út árið 2013 og segir frá Rachel Chu sem er bandarískur hagfræðiprófessor af kínverskum ættum, en kærasti hennar Nick býður henni með sér til Singapore í brúðkaup besta vinar síns. Rachel kemst fljótt að því að fjölskylda kærastans sé ein ríkasta fjölskyldan í Singapore. Tengdamóðirin er ekkert lamb að leika sér við og söguþráður myndarinnar tekur óvæntan snúning.
Smartland er á því að kjólarnir og jakkafötin á frumsýningu kvikmyndarinnar séu í sérflokki.