Ertu orðin allt of leið á gömlu útgáfunni af þér og þarftu nýja uppfærslu?
Árelía Eydís Guðmundsdóttir dósent við Háskóla Íslands uppfærði sig um daginn og sagði frá því í Skólablaði Morgunblaðsins. Hún uppfærði sig með því að taka til, hreyfa sig og fleira í þeim dúr. Það er líka hægt að uppfæra sig örlítið með því að hressa fataskápinn sinn örlítið við. Stundum þarf ekki meira en bara nýjan lit inn í líf sitt. Jafnvel lit sem við höfum aldrei hleypt inn en smellpassar kannski núna.
Ef þú vilt verða örlítið meira elegant og aðeins meiri spariskór þá er vínrauður liturinn. Hægt er að leika sér látlaust með vínrauðan en hann býr yfir ákveðinni dýpt sem er heillandi. Það þarf kannski ekki alltaf að fara í vínrauðan heilgalla, stundum er nóg að lakka neglurnar í vínrauðu eða setja á sig vínrauðan varalit. Þegar naglalökk eru annars vegar er liturinn 512 frá Chanel klassík. Og svo er Guerlain með frábæra glossa í vínrauðu sem kalla fram ákveðna berjaáferð.
Victoria Beckham fatahönnuður og ofurspariskór er aðeins að vinna með vínrauðan núna. Hún er kannski ekki í vínrauðu frá toppi til táar en notar vínrauða skó við gallabuxur og peysu eða er með vínrauða tösku. Hún er þó helst ekki í vínrauðum skóm með vínrauða tösku nema áferðin sé allt öðruvísi.
Ef þú færð þér vínrauða tösku þá parar þú skó við í öðrum lit ef þú ætlar að vera súperlekker.
Takið líka eftir einu eða hvernig frú Beckham girðir rúllukragapeysuna ofan í buxurnar á afslappaðan hátt. Þetta er nú eitthvað sem íslensk veðrátta myndi ráða við. Svo má fara í rykfrakka yfir eða eitthvað í þá áttina.
En gættu þess að gera stílinn að þínum, ekki apa allt blint upp eftir næstu manneskju. Það sem skiptir alltaf mestu máli þegar við klæðum okkur er að fötin veiti skjól fyrir veðri og vindum sem geta blásið um okkur í daglega lífinu. Þegar haustlægðirnar fara að mokast yfir landið þurfum við að vera við öllu búnar ef við ætlum ekki að tapa. Er það ekki?