Ítalskar jafnt sem íslenskar stjörnur hafa gift sig á Ítalíu að undanförnu en ítalski fatahönnuðurinn Stefano Gabbana var ekki hrifinn af sérsaumaða brúðarkjólnum frá Dior sem ítalska stjarnan Chiara Ferragni klæddist þegar hún giftist ítalska söngvaranum Fedez Leonardo um helgina.
People greinir frá athugasemd sem Gabbana, annar af stofnendum ítalska tískhússins Dolce & Gabbana, skrifaði við athugasemd við mynd Harper's Bazaar af Ferragni í kjólnum. „Ómerkilegur“ skrifaði Gabbana um kjólinn á Instagram og fékk í kjölfarið mikla gagnrýni.
Flestum þótti Ferragni stórglæsileg í brúðarkjólnum en hún klæddist tveimur öðrum sérsaumuðum kjólum frá Dior á brúðkaupsdaginn. Hún klæddist bæði síðum og stuttum tjullkjólum í veislunni en fram kemur hjá Dior að útsaumurinn á síða kjólnum tákni rómantíska og þýðingarmikla atburði í lífi hjónanna.