Leikmyndin á tískusýningu Chanel í París færði fyrrverandi strandvörðinn Pamelu Anderson á kunnuglegar slóðir en Karl Lagerfeld lét koma fyrir gerviströnd í Grand Palais fyrir sýningu Chanel. Fyrirsæturnar gengu um í sandinum og sýndu vor- og sumarlínu ársins 2019.
Þrátt fyrir að Anderson hafi ekki tekið með sér appelsínugula sundbolinn í þetta skiptið virtist hún kunna vel við sig í sandinum og fór úr skónum líkt og fyrirsæturnar. Anderson var sjálf klædd í fallega hvíta Chanel-dragt þegar hún fylgdist með fyrirsætunum ganga um í sandinum í ljósum og léttum klæðnaði.