Söngkonan Rihanna er alltaf með puttann á púlsinum þegar kemur að tísku eins og hún sannaði þegar hún fagnaði afmæli snyrtivörumerkis Fenty í Ástralíu en Fenty er hennar eigið merki. Rihanna var klædd í stuttan snákaskinnskjól og var í jakka og með hatt í stíl.
Undanfarið hefur níundi áratugurinn sett svip sinn á tískuna og bar dress Rihönnu með snákaskinnsmunstrinu þess merki. Það er þó kannski bucket-hatturinn hennar sem fólk setur stærsta spurningarmerkið við.
Bucket-hatturinn eða fötuhatturinn hefur átt erfiðara uppdráttar en litlu sólgleraugun en Rihanna má eiga það að hún gerði heiðarlega tilraun til þess að láta hattinn líta vel út. Á meðan einhverjir efast ekki um hversu flottur hatturinn hafi verið eru líklega jafnmargir sem myndu aldrei ganga með slíkan hatt.