Fólk er byrjað að setja nagladekkin undir og því nokkuð ljóst að veturinn er á næsta leiti. Tískan breytist mikið á sama tíma enda þarf fólk að vera við öllu búið í frosti og snjó. Nefhlíf er aukahlutur sem hefur vakið athygli á erlendum miðlum sem fjalla um tísku. Er nefhlífin talin geta leyst vanda fjölmargra.
Það vill nefnilega svo til að fáar flíkur halda sérstökum hita á nefi fólks enda stendur það ávallt út úr í kuldanum. Breska fyrirtækið The Nose Warmer Company framleiðir sérstakar nefhlífar sem gerðar eru til að hlýja fólki á nefinu. Á heimasíðu fyrirtækisins segir að eftir að fyrsta nefhlífin var búin til hafi eigandinn fljótlega áttað sig á að hann væri ekki sá eini glímdi við þetta vandamál, að vera kalt á nefinu.
Fólk kann að vera feimið við að ganga með nefhlífar eins og þessar en spurning hvort þetta sé þó ekki sá aukahlutur sem verður hve nauðsynlegastur þegar fer að kólna.