Stemningin var mikil í Ósló í síðustu viku þegar H&M fagnaði komu Moschino-línunnar sem mætir í Smáralind á morgun. Helstu áhrifavaldar í tískuheiminum á Íslandi og í Noregi voru boðnir í þetta teiti sem haldið var í galleríi í miðborg Óslóar.
Boðið var upp á ginkokkteila og street food en það var íslenski plötusnúðurinn Dóra Júlía sem sá um tónlistina. Hún er einn vinsælasti plötusnúðurinn í dag en fyrir um tveimur vikum spilaði hún í teiti hjá Richard Branson á Bresku-Jómfrúareyjunum.
Samstarsverkefni H&M og Moschino er afar spennandi og þeir sem fíla liti, gull og svolítið ögrandi fatnað eiga eftir að tryllast þegar línan mætir. Þar er til dæmis hægt að kaupa gullleðurbuxur sem koma reyndar líka í svörtu, gimsteinaklæddan brjóstahaldara, undirföt og íþróttaföt.
Storm Pedersen klæddist til dæmis silfurlituðum pallíettubuxum úr línunni og Skam-leikarinn Hermann Tømmeraas var í gráum íþróttagalla úr línunni með hálsmen sem einnig er úr línunni. Smartland var að sjálfsögðu á staðnum til þess að upplifa þessa dýrð í öllu sínu veldi.