Bollywood og Hollywood-stjörnurnar Priyanka Chopra og Nick Jonas gengu í það heilaga um síðustu helgi að kristnum og hindúasið. Einn brúðarkjóll gekk því ekki fyrir Chopra sem klæddist hefðbundnum hvítum kjól í athöfn að kristnum hætti og voru hin fötin undir indverskum áhrifum, gullfallegt rautt pils og toppur við.
Hello og People fengu einkarétt á myndum hjónanna og greindi Chopra frá því í viðtali við Hello að Ralph Lauren hefði hannað hvíta brúðarkjólinn. Áður en hann hannaði kjól indversku leikkonunnar hafði hann aðeins hannað þrjá brúðarkjóla, á dóttur sína, tengdadóttur og frænku.
Hvíti kjóllinn var skreyttur Swarovski-kristölum og tók 1.826 klukkutíma að klára kjólinn sem fylgdi 75 metra langt slör.