Meghan hertogaynja var glerfín þegar hún heimsótti elliheimili í gær, þriðjudag. Var hún berleggja í hvítum kjól. Kjóllinn sem er ekki sérstaklega hannaður fyrir óléttar konur sýndi óléttukúlu Meghan mjög vel en kúlan er orðin ansi myndarleg.
Hvíti kjóllinn er frá bandaríska lúxusmerkinu Brock Collection og kostar 1.480 dollara eða um 180 þúsund krónur. Kjóllinn er úr fatalínu fyrir árið 2019 og Meghan því einu skrefi á undan flestum sem enn eru í fötum frá árinu 2018.
Hálsmálið, rykktar ermarnar og mynstrið gerir kjólinn afar hátíðlegan og myndi Elísabet Bretadrottning líklega ekki setja út á það ef Meghan klæddist kjólnum í boði hennar á jóladag.