Lady Gaga vakti ekki bara athygli fyrir að klæðast stórum og miklum kjól á Golden Globe-hátíðinni. Hálsmenið sem hún bar var ennig mjög stórt og fyrirferðamikið, um var að ræða demanta frá Tiffanys.
Á vef InStyle kemur fram að hálsmenið heiti Tiffany Aurora og magn dýrmætra steina á því sé stjarnfræðilegt. Demantanir á hálsmeninu eru sagðir yfir 60 karöt en dropinn sem setur punktinn yfir i-ið er 20 karöt. Samtals eru rúmlega 300 demantar á hálsmeninu.
Sama hversu mikla peninga fólk á er ekki hægt að labba inn í Tiffany & Co. og kaupa hálsmen eins og þetta. Yfirgimsteinafræðingur fyrirtækisins segir í greininni að hálsmenið hafi verið sérstaklega búið til fyrir stjörnuna.
Þrátt fyrir að það sé ekki hægt að setja verðmiða á hálsmenið kemur fram á vef The Hollywood Reporter að virði þess sé fimm milljónir Bandaríkjadala eða rúmlega 592 milljónir íslenskra króna.
Auk hálsmensins var hún með eyrnalokka sem metnir kosta 115 þúsund Bandaríkjadali eða 13,6 milljónir íslenskra króna og armbönd í stíl. Hringurinn sem hún bar var trúlofunarhringur hennar.