Með íslenska hönnun á rauða dreglinum

Breska leikkonan Gemma Whelan skartaði íslenskri hönnun þegar hún mætti á BAFTA-verðlaunin í Royal Albert Hall á sunnudaginn. Whelan var með eyrnalokka og armband úr nýrri línu frá Aurum by Guðbjörg en línan ber nafnið SAND. 

Fallegir skartgripirnir pössuðu vel við klassíska ljósbláa kjólinn sem Whelan klæddist á verðlaunaafhendingunni. Bæði armbandið og eyrnalokkarnir eru með perlum og hentuðu hátíðlegu tilefninu afar vel. 

Gullsmiðurinn Guðbjörg Kristín Ingvarsdóttir sótti innblástur í íslenskt landslag og þá sérstaklega strendur á Vestfjörðum sem hún kann einstaklega vel við vegna þess hversu friðsælar strendurnar eru.