Mannréttindalögfræðingurinn Amal Clooney þykir sjaldan slá feilnótu þegar kemur að klæðaburði. Í síðustu viku hefur hún leyft annarri öxlinni að njóta sín og virðist sniðið vera í sérstöku uppáhaldi hjá frú Clooney.
Þann 7. maí mætti frú Clooney með manni sínum, George Clooney, á frumsýningu í Kaliforníu í grænum stuttum kjól frá Oscar de la Renta. Kjóllinn vakti athygli fyrir að vera með stóra ermi öðrum megin en hin öxlin var ber.
Það vakti því aftur athygli þegar Amal Clooney mætti aðeins þremur dögum seinna í kjól sem einnig leyfði annarri öxlinni að njóta sín á viðburð á vegum Omega.
Gyllti sérsniðni Armani-kjóllinn með kögrinu var allt öðruvísi en græni kjóllinn frá því nokkrum dögum áður fyrir utan þá staðreynd að önnur öxlin fékk að njóta sín ber rétt eins og í græna kjólnum.