Buxnadragt er ekki bara buxnadragt eins og sjá mátti á fötunum sem leikkonan Cate Blanchett mætti í þegar myndin Where'd You Go, Bernadette var sýnd í New York á dögunum. Svört buxnadragt hennar hefur fengið afar jákvæð viðbrögð frá tískuheiminum.
Buxnadragtin er úr haust- og vetrarlínu Alexander McQueen árið 2019 og er með einstökum bláum silkiermum. Ermarnar minna svolítið á kjóla frá níundaáratugnum en passa fullkomlega við annars einfalda buxnadragtina.
Síðustu misseri hafa buxnadragtir í öllum stærðum og gerðum komið sterkar inn. Blanchett sannar það hér enn og aftur að buxnadragtir þurfa ekki að vera eins og leiðinlegur skrifstofuklæðnaður.