Símar teknir af stjörnum á tískusýningu Rihönnu

Það vakti athygli að gestir á tískusýningu Fenty, hátískumerkis tónlistarkonunnar Rihönnu, þurftu að afhenda síma sína áður en þeir gengu inn á tískusýninguna sem er hluti af tískuvikunni í New York. 

Ástæðan er sú að Amazon hefur tryggt sér sýningarréttinn að sýningunni. Þetta er allóvanalegt og hefur aldrei verið gert. Tískusýningin mun verða aðgengileg á streymisveitu Amazon 20. september næstkomandi. 

Með sýningunni blandar Rihanna saman tónlist, tísku og menningu en DJ Khaled, Halsey, Big Sean og Migos spiluðu. Á meðal fyrirsætanna sem gengu pallinn voru Gigi og Bella Hadid, Normani og Cara Delevingne. 

Þær voru allar stórglæsilegar á rauða dreglinum fyrir tískusýninguna en á meðal þeirra voru líka Paris Hilton, fyrirsætan Ashley Graham og leikkonan Vanessa Hudgens.