Þýska karlfyrirsætan Leon Dame lokaði tískusýningu Maison Margiela í París á miðvikudaginn. Dame sló í gegn með göngulagi sínu og fékk ekki bara fólk til þess að tala um sig heldur byrjaði söngkonan Rihanna að fylgja honum á Instagram svo tilkomumikil var framkoma hans.
Dame var í fötum sem virtust vera blanda af sjóliðafatnaði og áhrifum frá gömlum hermannabúningum. Hann valsaði um tískupallinn í uppháum stígvélum með háum hælum og setti sig í stellingar þannig að sjálfur Derek Zoolander hefði ekki þorað að mæta honum.
Dame sagði í viðtali á vef Vogue að hann hefði æft þessa eftirminnilegu framkomu með danshöfundi kvöldið áður. Dame er ekki nema tvítugur en hefur þó áður komið fram á sýningum Margiela og vakið hrifningu John Galliano, listræns stjórnanda tískuhússins.
Dame birti myndband af innkomu sinni á Instagram og er sjón sögu ríkari.
Eins og áður sagði minnti vor- og sumarlína franska tískuhússins á gamla hermannabúninga og annan fatnaði tengdan stríðsárunum í Evrópu á 20. öldinni.