Það var ekki þverfótað fyrir frægðarmennum þegar Giambattista Valli og H&M frumsýndu samstarfsverkefni sitt í einni glæsilegustu höll Rómaborgar í síðustu viku. Sú sem hér skrifar fékk að upplifa þessa dýrð með eigin augum. Hápunktur kvöldsins var líklega að sjá Kendall Jenner með eigin augum.

Það voru glaðir tískusýningagestir sem mættu í Palazzo Doria Pamphilj-höllina í Róm á fimmtudaginn í síðustu viku. Höllin er þekkt fyrir listaverk sín og mikilfengleika. Þar er hátt til lofts og vítt til veggja og ekki að finna auðan eða óskreyttan flöt. Til þess að gera tískusýninguna enn áhrifameiri var búið að teppaleggja tískusýningapallana með bleikum gólfteppum og sátu gestirnir á sérútbúnum speglabekkjum. Inni á milli mátti sjá stæðurnar af hortensíum og því var ekki hægt að kvarta undan vondri lykt.

Giambattista Valli er ítalskur tískuhönnuður sem hefur notið mikillar velgengni. Honum fannst mikilvægt að halda þennan viðburð í Róm, þar sem hún er heimavöllur hans.

Samstarf sænska móðurskipsins H&M hófst árið 2004 þegar fyrirtækið gerði fyrstu línuna með Karli Lagerfeld heitnum sem féll frá fyrr á þessu ári. Þar sem samstarfið vakti mikla athygli var ákveðið að gera þetta aftur ári seinna. Undirrituð var einmitt stödd í Kaupmannahöfn þarna í byrjun nóvember 2004 og var ein af þeim sem biðu í röð fyrir utan H&M. Sem var alveg vel þess virði því ég er enn að nota einn stuttermabol úr línunni og nýlega búin að henda ermalausri shiffon-skyrtu úr þessari línu vegna þess að hún var farin að gefa sig vegna ofnotkunar.

Víkjum aftur að tískusýningunni sjálfri í Róm. Ég sat á ansi góðum stað ásamt nýju bestu vinkonu minni, Caroline Skeldbred, sem er blaðamaður á norska Elle. Við biðum í dágóða stund og vorum umkringdar þekktu fólki úr elítuheiminum. Og svo byrjaði þetta allt saman og tóku hjörtu okkar nokkur aukaslög þegar Kendall Jenner sjálf birtist á tískusýningarpallinum fyrir framan okkur. Þar var líka ameríska söngkonan og lagahöfundurinn Gabriella Wilson, leikkonan Alexa Demie, leikarinn Cameron Monaghan og ítalski áhrifavaldurinn Chiara Ferragni.

Kjólarnir í línunni passa kannski ekki sérstaklega vel ef fólk er alltaf bara heima hjá sér að horfa á sjónvarpið en fyrir þá sem elska að klæða sig upp á er af nægu að taka. Á tískusýningunni var líka sýnt hvað tjullkjólar eru svalir við hettupeysur, svo dæmi sé tekið. Það sem vakti athygli var að fyrirsætur voru í öllum fatastærðum, ekki bara í stærð XS. Stíliseringin var líka sérlega flott og skilin milli kynjanna voru nokkuð á reiki. Strákarnir voru með perlufestar og farðaðir og stelpurnar í strákafötum úr línunni. Sem er í takt við ráðandi tískustrauma. Það að skilgreina kyn sitt eitthvað sérstaklega er nefnilega svo mikið „last season“. Það vita það allir nema Íslandsbanki!