Franska tískuhúsið Celine, með Hedi Slimane innanborðs, sýndi heillandi línu á tískuvikunni í París í haust. Þetta er þriðja línan sem hann gerir fyrir Celine en áður vann hann fyrir YSL.
Eins og allir alvörugreifar sótti Slimane innblástur í áttunda og níunda áratuginn og selur fólki þær hugmyndir að útvíðar gallabuxur séu það sem þú verður að eignast fyrir sumarið. Útvíðar gallabuxur, gallaskyrta og blazer-jakki, flaksandi hár og risasólgleraugu er eitthvað sem lengra gengnar skvísur eiga eftir að elska. Risasólgleraugu með örlítilli skyggingu virka eins og gríma þegar við erum eitthvað illa fyrirkallaðar og þurfum vernd frá umhverfinu. Svo segja helstu heilsugúrúar heimsins að það fari betur með lífsklukkuna að vera ekki í flóðlýsingu og betra sé að lifa í örlitlum skugga.
Fyrir þær sem þola ekki gallabuxur og vilja vera aðeins frjálsari eru líka kjólar í línunni úr léttum efnum. Slimane gætir þess vel að taka þá inn í mittið til að leyfa kvenlegum línum að njóta sín. Hvítar útvíðar gallabuxur koma líka sterkar inn og jakkar með gulltölum og svo má ekki gleyma Bermúdabuxunum. Þær munu slá öll met með vorinu. Til þess að vera ekta áttundaáratugar-gella gætir þú farið í leðurstígvél við (eða pleður, ef þú ert vegan). Til að ná þessu lúkki skiptir máli að fara í skó með þykkum hæl og helst með platformi undir tánni. Þessir þykkbotna skór passa líka vel við útvíðu buxurnar og svo lítur hinn hefðbundni kvenmaður út fyrir að vera örlítið spengilegri þegar leggurinn fær örlitla upphækkun. Hver myndi fúlsa við því!