Tískuvörufyrirtækið Louis Vuitton mun hefja framleiðslu á handspritti í dag. Eigandi Louis Vuitton, LVMH, tilkynnti þetta í gær.
Skortur á handspritti hefur verið víða í Frakklandi og hyggst LVMH gefa heilbrigðisyfirvöldum í Frakklandi alla framleiðsluna án endurgjalds.
„Við munum senda handsprittið án endurgjalds til heilbrigðisyfirvalda. LVMH mun nýta framleiðslu sína á ilmvatni og snyrtivörum til þess að framleiða handspritt í miklu magni frá og með mánudeginum,“ segir í tilkynningu frá fyrirtækinu.
Í ilmvatns- og snyrtivöruverksmiðjum LVMH eru alla jafna hágæða snyrtivörur framleiddar fyrir stærstu og dýrustu snyrtivörumerki heims, Christian Dior og Givenchy.
Útbreiðsla kórónuveirunnar hefur haft mikil áhrif í Frakklandi, en veitingastöðum, kaffihúsum og verslunum sem selja annað en nauðsynjar hefur verið lokað þar í landi.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.