Lífsgæðaaukning á sundlaugarbakkanum

Hér má sjá baðfatatopp frá netversluninni Heima er gott.

Íslendingar tóku gleði sína á ný þegar sundlaugar landsins voru opnaðar á ný eftir samkomubann. Einhverjir göntuðust með það að þeir lifðu svo goslausu lífi að sundferðir væru kryddið í tilveruna. Enda er heiti potturinn svolítið eins og ferð á Kaffibarinn ef þú ert komin/n yfir fimmtugt.

Þessi sólarvörn frá Biotherm er mjög góð og svo ilmar hún sérstaklega vel.

Stór hópur er á því að það að komast í sund sé ein mestu lífsgæði fólks hérlendis. Það er þó hægt að gera meira í sundi en að synda þótt það sé vissulega gott fyrir heilsuna. Þar er hægt að liggja á sólbekkjum þegar vel viðrar og láta sólina leika um andlitið og líkamann. Það skiptir sumt fólk máli að eiga þægileg og klæðileg sundföt; sundföt sem gera það að verkum að við getum verið frjáls í vatninu, synt eða legið í pottinum án þess að fatnaðurinn sé heftandi á nokkurn hátt.

Þessi sundbolur er frá Speedo.

Þegar velja á sundföt skiptir mestu máli hverju þú ert að leita að. Ef þú vilt hafa allt á sínum stað, brjóst, mitti og allt það, er Sculpture-sundbolalínan frá Speedo frekar góð. Hún heldur vel að og veitir fólki öryggistilfinningu á sama tíma. Þetta er allavega línan sem mömmurnar og mögulega verðandi ömmurnar eru alveg sjúkar í.

Ef þú vilt meiri gleði og liti koma verslanir eins og H&M og Lindex að góðum notum en sundfötin frá þeim eru á góðu verði. Oft er hægt að finna sundföt í fallegum litum og sniðum sem hressa upp á stemninguna.

En hvað gerir þú á sólbekknum í íslenskum sundlaugum? Ef þú ert vön að liggja og lesa í sumarfríum í heitari löndum ættirðu að halda þeim sið áfram. Út eru komnar nokkrar bækur sem vert er að lesa eins og Sumarbókin, Eftir endalokin og Lífsgæðadagbókin. Ef þú lest þær allar muntu líklega eiga mjög eftirminnilegt og gott sumar því þessar bækur hreyfa við fólki.