„Samfélagið hatar feitt fólk“

Fyrirsætan Tess Holliday mætti í bleikum jarðarberjakjól á Grammy-verðlaunahátíðina í byrjun árs. Eftir hátíðina lentu hún og kjóllinn á listum margra tískumiðla yfir verst klæddu stjörnurnar á hátíðinni.

Nú er þessi sami kjóll frá hönnuðinum Liriku Matoshi einn vinsælasti kjóll sumarsins og var meðal annars á lista The New York Post yfir nauðsynlega kjóla fyrir sumarið. Vogue fjallaði einnig um kjólinn nú fyrr í ágúst í færslu þar sem velt var vöngum yfir því hvernig þessi einstaki jarðarberjakjóll varð svona vinsæll.

Holliday sjálf velkist ekki í vafa um af hverju kjóllinn þótti ljótur þegar hún klæddist honum en gríðarlega vinsæll þegar grannar fyrirsætur og áhrifavaldar klæddust honum. Hún segir að það hafi ekkert með útlit eða hönnun kjólsins að gera heldur hati samfélagið einfaldlega feitt fólk.

Í færslu á Twitter skrifaði Holliday: „Ég er hrifin af því hvernig ég komst á listann yfir verst klæddu stjörnurnar þegar ég klæddist þessum kjól í janúar en núna, þegar fullt af grönnu fólki er í honum á Twitter, eru allir að missa sig. Til að draga þetta saman: Samfélagið hatar feitt fólk, sérstaklega þegar það stendur sig vel,“ skrifaði Holliday. 

• Blogga um frétt