Konur og stúlkur í neyð eru sérstaklega berskjaldaðar fyrir kynbundnu ofbeldi. Sprengingarnar í Líbanon, 4. ágúst, kórónuveirufaraldurinn og djúpstæð efnahagskreppa hafa áhrif á stöðu kvenna í Líbanon. UN Women hefur látið hanna boli og rennur ágóðinn til upprætingar á ofbeldi gegn konum og stúlkum í Líbanon.
Salan á bolnum hófst í dag en listamaðurinn GDRN leggur átakinu lið en bolurinn skartar ljóði eftir hana.
Eins og áin.
Breytileg og kröftug.
Straumþung og flæðandi.
Hún tekur óvæntar stefnur.
Stundum er lítið í henni.
En sama hvað heldur hún áfram að streyma.
Saman stýrum við straumnum.
-gdrn
FO bolurinn er rjómalitaður í yfirstærðar-sniði úr mjúkri bómull. Framan á er ljósmynd eftir Önnu Maggý sem sýnir FO á táknmáli. Aftan á er frumsamið ljóð eftir GDRN um baráttuna gegn kynbundnu ofbeldi. Aldís Alma Hamilton lagði einnig átakinu hjálparhönd og myndar FO á íslensku táknmáli.
Með því að kaupa FO bolinn tekur þú þátt í að veita konum og stúlkum í Líbanon neyðaraðstoð, vernd, öryggi og kraft til framtíðar. Vodafone er bakhjarl átaksins og gerir okkur kleift að senda allan ágóða sölunnar til UN Women í Líbanon.