Hin indverska Priyanka Chopra varð fræg þegar hún var krýnd Ungfrú heimur fyrir 20 árum en í dag er hún heimsfræg leikkona. Chopra hefur nokkrum sinnum liðið illa í flottum fötum fyrir framan heimsbyggðina. Hún átti til dæmis í vandræðum með að missa ekki kjólinn niður um sig þegar hún vann keppnina Ungfrú heim.
„Árið var 2000 og ég vann Ungfrú heim, kjóllinn minn var límdur á mig. Þegar ég vann í lokin svitnaði ég svo mikið af stressi að límið lak af,“ sagði Chopra á vef People. „Allan þann tíma sem ég tók sigurgönguna eða hvað það kallast þegar ég vann hélt ég höndunum í bænastöðu, fólk hélt ég væri að þakka fyrir en í rauninni gerði ég það til að halda kjólnum uppi. Svo óþægilegt.“
Chopra var orðin töluvert frægari þegar hún lenti síðast í óþægilegu atviki. Leikkonan var á Met Gala-góðgerðarkvöldinu fyrir tveimur árum. Hún leit ekki út fyrir að líða illa í guðdómlegum kjól frá Ralph Lauren en sannleikurinn er allt annar.
„Ég var í lífstykki undir og gat ekki andað. Mér leið eins og það væri búið að endurmóta rifbeinin. Það var erfitt að sitja í kvöldmatnum og augljóslega gat ég ekki borðað mikið þetta kvöld.“