Íslendingar verða að vera duglegir að þvo sér um hendurnar um jólin. Fyrir Íslendinga sem vilja leggja sig fram um að gera það vel getur kórónusápan verið smart jólagjöf í pakkann. Sápan er í umhverfisvænum umbúðum og fæst hjá Skýjaverksmiðjunni, Listasafni Íslands og Rammagerðinni svo eitthvað sé nefnt.
Sápan sem Skýjaverksmiðjan gerir er myndlistartengdur varningur. Það eru systurnar og myndlistarkonurnar Ragnhildur Lára og Margrét Helga Weisshappel sem hönnuðu sápuna, sem er í laginu eins og kórónuveiran. Handþvotturinn verður að eins konar handnuddi segja þeir sem hafa notað sápuna.