Raunveruleikastjarnan Kim Kardashian West valdi heldur betur óhefðbundinn jólakjól þetta árið. Jólakjóllinn var grænn með upphlut úr grænu leðurefni og ljósgrænu flauelspilsi. Kjóllinn þykir helst minna á búning ofurhetju og hafa margir furðað sig á vali Kardashian West.
Upphluturinn er úr smiðju Schiaparelli Haute Coture og með ámáluðum kviðvöðvum. Pilsið er úr smiðju hins ítalska Daniel Roseberry. Hún var með hátt tagl í hárinu og stóra eyrnalokka einnig frá Schiaparelli.
„Þetta lítur út eins og Hulk-búningur,“ skrifaði einn notandi á Twitter. Öðrum þótti hún frekar líta út eins og skjaldbökurnar vinsælu úr Teenage Mutant Ninja Turles. „Er það bara ég eða klæddi Kim Kardashian sig upp sem Teenage Mutant Ninja Turtles á jólunum?“ skrifaði einn á Twitter.
Sumum fannst þó kjóll Kardashian West fínn og hrósuðu henni fyrir hugrekki. Systir hennar, Khloé Kardashian, sagði hana vera drottningu.