Ekki pláss fyrir marga loðna jakka í litla húsinu

Sjónvarpsstjarnan Berglind Pétursdóttir eða Berglind Festival eins og hún er kölluð er með rýmingarsölu á eigum sínum. Berglind segir nauðsynlegt að taka til reglulega enda er hún ekki með geymslu, auk þess eru framkvæmdir á næsta leiti í húsinu. 

Á síðu Berglindar má meðal annars finna föt, raftæki, skó, bækur og barnavörur. „Það er nú þannig að ég bý í íbúð þar sem er engin geymsla svo það er nauðsynlegt að hreinsa vel til reglulega,“ segir Berglind um rýmingarsölu á eigin eignum. „Svo er þetta svo gamalt hús að það þarf að skipta um glugga og ég er að safna mér fyrir þeim.“

Kjóll frá Hildi Yeoman. Ljósmynd/Berglind Festival

„Þetta eru alls konar föt og dót sem ég hef sankað að mér svona síðustu tíu ár, mjög margt sem ég hef keypt á ferðalögum til dæmis í Úkraínu og Japan. Og hlutir sem ég keypti þegar ég bjó erlendis, bollastell sem ég fékk í Bretlandi þegar ég var ólétt þar í skiptinámi að kafna úr hreiðurgerð,“ segir Berglind. 

Frétt af mbl.is

Ég reyni að kaupa ekki allt of ljótt dót

„Ég er sjúk í yfirhafnir og flottar kápur og jakka. Mokkajakkinn sem ég leitaði að í hundrað ár og fann loksins er til dæmis strax seldur. Svo er einn pels þarna úr svörtum hárlengingum. Það er einfaldlega ekki pláss fyrir svona marga loðna jakka í litla húsinu mínu.“

Berglind á marga loðna jakka. Ljósmynd/Berglind Festival

Berglind tekur fram að öll sala fari fram rafrænt vegna kórónuveirufaraldursins. Sjálf er hún í síðasta bólusetningarhópnum svo það er nokkuð í það að hún verði fullbólusett. Hún bjó til síðuna Festivalmarket.online þar sem hægt er að skoða allt sem hún er með á sölu. 

Á flóamarkaði Berglindar er meðal annars að finna hljóðfæri. Ljósmynd/Berglind Festival

Skvísustígvél. Ljósmynd/Berglind Festival

• Blogga um frétt