Penelope Cruz sportaði sig um í Chanel-fötum í Feneyjum í vikunni. Þar er enn þá sól og sumar og því hægt að klæðast opnum skóm og stuttum pilsum.
Alþjóðlega kvikmyndahátíðin í Feneyjum er haldin í 78. skipti um þessar mundir. Þótt það sé að hausta í Reykjavík og nærsveitum þá er enn þá sumar á Ítalíu eins og sést á einni skærustu stjörnu hátíðarinnar, Penelope Cruz. Hún klæddist fatnaði frá Chanel á hátíðinni sem samanstóð af hvítu stuttu pilsi, hvítum bol og hvítum jakka með bláum kraga, bláu stroffi á ermum og bláu fóðri. Við dragtina var hún með hvítan Boy bag frá Chanel og í hvítum sandölum við.
Leikkonan kemur vel undan sumri með örlitlar strípur í endunum á hárinu og nokkuð ánægð með lífið ef marka má myndirnar. Rautt naglalakk setur punktinn yfir i-ið!
Þess má geta að Cruz er ekki eina kvenkynsveran sem fílar svona töskur því Birgitta Líf Björnsdóttir áhrifavaldur og markaðsstjóri World Class á svona tösku í beige-lit sem hún hefur notað ríkulega síðustu ár.