Tónlistarmaðurinn Ed Sheeran er búinn að uppfæra fatastíl sinn ef marka má myndir af rauða dreglinum á MTV VMA-tónlistarhátíðinni sem fór fram í Bandaríkjunum um helgina. Sheeran virðist hafa fengið innblástur frá öðrum rauðhærðum tónlistarmanni frá Bretlandi, tónlistarmanninum Elton John.
Sheeran hefur ekki farið leynt með breyttan fatastíl sinn á instagramsíðu sinni undanfarnar vikur og klætt sig í anda Johns ítrekað. Nú er komið í ljós að Sheeran sækir ekki bara innblástur fyrir fatastíl sinn til Johns heldur eru þeir félagar að vinna saman að lagi sem kemur út á næstu vikum.
John hefur verið þekktur fyrir litríkan fatastíl sinn í gegnum áratugina og en hann er með eindæmum glysgjarn. Þá klæðist hann oft litríkum jakkafötum, skreytir sig með fjöðrum og glingri og setur ætíð punktinn yfir i-ið með litríkum, stórum gleraugum.
Um helgina klæddist Sheeran jakka frá Versace, en John er einmitt einstaklega hrifinn af Versace. Jakkinn er með fallegu mynstri og kragi skyrtunnar var skreyttur í stíl.
Stíll Sheerans undanfarin ár hefur verið heldur látlaus og klæðist hann yfirleitt gallabuxum og bol. Stundum bregður hann sér einnig í hettupeysu, líkt og hann gerði þegar hann spilaði hér á Íslandi.