Leikkonan Helen Mirren gekk tískupallinn fyrir snyrtivöruframleiðandann L'Oréal í París á dögunum. Mirren er 76 ára gömul og því töluvert eldri en hin venjulega fyrirsæta. Hún gaf þeim yngri þó ekkert eftir. 

Mirren var í svartri töffaralegri buxnadragt frá Azzaro og þykkbotna hælum líkt og unglingur þegar hún gekk niður tískupallinn með Eiffel-turninn í baksýn. Svartur rokkaður augnblýanturinn gerði það að verkum að Mirren leit frekar út fyrir að vera 18 en 76 ára. 

Hollywood-stjarnan þykir bera aldurinn sérstaklega vel og hárlitur hennar vekur ætíð mikla athygli. Andltið er ekki rennislétt en annað væri óeðlilegt fyrir konu á hennar aldri. Þegar L'Oréal kynnti auglýsingaherferð með Mirren í aðalhlutverki fyrir nokkrum árum var greint frá því að andlit hennar væri ekki breytt í myndvinnsluforritinu Photoshop. 

Aðrar fyrirsætur voru yngri en Mirren eins og sjá má á myndunum hér að neðan.