Örfáir dagar í brúðkaup og kjóllinn ófundinn

Svo virðist sem hótelerfinginn Paris Hilton sé óákveðin í öllum undirbúningi fyrir væntanlegt brúðkaup sitt og viðskiptamannsins Carters Reums. Samkvæmt fréttamiðlinum Page Six á brúðkaupið að fara fram 11.11. '21 en Hilton hefur ekki enn valið sér brúðarkjól.

Hilton sást þræða brúðakjólaverslanir í New York-borg ásamt systur sinni, Nicki, í liðinni viku. Mátaði hún nokkra kjóla en fann ekki hinn fullkomna kjól. Þá var hún líka að vandræðast með merkið, en valið stendur á milli tískurisanna Valentinos og Oscars de La Renta.

Óákveðni hennar nær ekki eingöngu til klæðaburðarins heldur breyttu tilvonandi hjónin líka um staðsetningu á síðustu stundu. Í síðustu viku tilkynntu þau breytta staðsetningu en upphaflega ætluðu þau að hafa athöfnina í kirkju við hið sögulega Bel Air-bú sem var í eigu látins afa hennar, Barrons Hiltons.

Þau plön hafa sem sagt breyst og hafa þau ákveðið að teygja brúðkaupsfjörið yfir þrjá daga. Standa vonir til að aðalskemmtunin fari fram á Santa Monica-ströndinni þar sem verður karnivalsþema en hinir tveir dagarnir eru bundnir óvissu.

• Blogga um frétt