Það má með sanni segja að tónlistarkonan Cardi B hafi tjaldað öllu til á Bandarísku tónlistarverðlaununum sem fóru fram í Los Angeles á sunnudagskvöld. Tónlistarkonan hóf kvöldið á rauða dreglinum með furðulega gyllta grímu og lauk því á hvítu dressi með verðlaun fyrir vinsælasta hipphopplagið.
Við grímuna var hún í svörtum kjól frá Schiaparelli, með stóra eyrnalokka sem minntu helst á ljósakrónu og svart slör yfir höfðinu.
Alls sýndi hún átta klæðnaði á hátíðinni. Þegar hún tók á móti verðlaununum klæddist hún grænum kjól með stórri skikkju. Í tónlistaratriðum sínum var hún svo í fimm mismunandi kjólum og lauk kvöldinu í hvítum kjól með hettu.