Sjónvarpsdrottningin Martha Stewart hefur sennilega aldrei verið frægari á ferli sínum en nú. Stewart, sem er 80 ára gömul, er orðin ein skærasta TikTok-stjarnan og hafa yfir 70 milljónir horft á myndböndin hennar.
Stewart er nýtt andlit japanska snyrtivörumerkisins Clé de Peau og hefur á undanförnum vikum framleitt hvert myndbandið á fætur öðru fyrir TikTok. Notendahópur TikTok er talsvert yngri en Stewart eða 13 til 25 ára.
Í myndböndunum auglýsir hún rándýr krem og segir frá leyndardómnum á bak við vel nærða húð. Stewart lítur vel út í myndböndunum og segir sjálf að engir filterar hafi verið notaðir við gerð myndbandanna. Þá hefur hún aldrei farið í lýtaaðgerð.
„Ég get algjörlega sagt það. Enginn hnífur hefur snert andlit mitt, háls eða bak,“ sagði Stewart í viðtali við New York Times. Hárgreiðslumaðurinn hennar John Barrett samsinnir því og sagði að hún hafi aldrei verið í fríi nógu lengi til að jafna sig á aðgerð úr sviðsljósinu.
Stewart hefur þó farið í minniháttaraðgerðir, lætur laga áferðina á húðinni, lýsa hana og fer í fyllingar. Einn af tveimur húðlæknum hennar í New York staðfestir það og segir hana vanda valið. Þá notar hún aðeins það besta á húðina og vinnur nú að gerð CBD húðvörulínu með Dr. Dhaval Bhanusali.