Charlene prinsessa er snúin aftur í sviðsljósið með afgerandi hætti. Hún hefur ekki slegið feilnótu hvað klæðaburð varðar og veitir Letiziu Spánardrottningu harða samkeppni um að vera talin best klædd af evrópska kóngafólkinu.
Nú síðast heillaði hún alla í fagurgrænum síðkjól frá tískuhúsinu Lanvin. Kjóllin kostar litlar 2700 pund eða um 400 þúsund íslenskar krónur. Kjóllinn er mjög sígildur í útliti með rykkingum á öxlinni og pífum í pilsfaldinum og hentar sniðið hvaða vaxtarlagi sem er. Kjóllinn er sagður hannaður út frá gömlum teikningum tískuhússins og endurspeglar hann því vel sögu og áherslur Lanvin í gegnum tíðina.
Við kjólinn bar hún síða eyrnalokka sem gefa gott mótvægi við stuttklippt hárið og var í látlausum gullskóm við. Aðdáendur á samfélagsmiðlum létu ekki sitt eftir liggja og voru almennt á einu máli um hversu vel prinsessan leit út.
Þá þykir það einkar ánægjulegt að sjá geisla af henni en hún hefur glímt við afar erfið veikindi sem tók mikið frá henni andlega og líkamlega.