Stelpurnar okkar hafa margar hverjar skartað tveimur föstum fléttum í leikjum sínum á Evrópumeistaramótinu í fótbolta sem fram fer á Englandi um þessar mundir. Flétturnar eru ákaflega smart en líka þægilegar þegar konur spila fótbolta.
Sveindís Jane sagði frá fléttunum í fyrsta þætti af Dætur Íslands í byrjun sumars. Hún spilar alltaf með tvær fléttur í hárinu og „Ég geri það alltaf sjálf, er orðin mjög fljót að því núna. Ég er búin að vera gera þetta í nokkur ár núna,“ sagði Sveindís þegar Bjarni Helgason blaðamaður mbl.is spurði út í flétturnar.
Liðsfélagar Sveindísar í landsliðinu virðast hafa fengið góð ráð frá henni um hárgreiðsluna en í þeim leikjum sem þær hafa spilað á EM hafa Dagný Brynjarsdóttir og Karólína Lea Vilhjálmsdóttir skartað eins fléttum.