MTV VMA-verðlaunahátíðin var haldin í gærkvöldi í New Jersey, Bandaríkjunum. Mikill glamúr var á rauða dreglinum þar sem dökkir litir og demantar voru áberandi.
Það er óhætt að segja að rapparinn Lil Nas X hafi stolið senunni þegar hann mætti á hátíðina í dramatísku dressi eftir Harris Reed sem vakti mikla lukku á tískuvikunni í London fyrr á árinu. Dressið samanstóð af athyglisverðu höfuðskrauti og pilsi úr svörtum fjöðrum.
Glimmer og glamúr standa alltaf upp úr á rauða dreglinum. Tónlistarkonan Taylor Swift var þakin demöntum í glæsilegum kjól frá Oscar de la Renta og með skart frá Lorraine Schwartz. Hljómsveitin Måneskin vakti einnig mikla athygli, en þau klæddust fatnaði frá Gucci.
Eftir litríkt sumar virðast Hollywood-stjörnurnar vera komnar í haustfíling, en dökkir litir og dramatík einkenndu rauða dregilinn í ár. Tónlistarkonan Lizzo mætti í glæsilegum kjól eftir Jean Paul Gaultier og fyrirsætan Ashley Graham var sjóðheit í kjól frá
Houghton.