Það styttist í það að jólasveinarnir komi til byggða en ólátabelgirnir hennar Grýlu eru þekktir fyrir skeggið sitt. Íslenskir karlmenn hafa tekið upp á því að láta skegg sitt vaxa en líklega fer það mönnum misjafnlega eins og sjá má hér að neðan.
Bjarni er stundum með skegg og stundum ekki. Kannski raksturinn fari bara eftir því í hvernig skapi hann er. Bjarni er orðinn afi og það er klárlega passar vel við hlutverkið að vera með smá grátt skegg.
Ragnar Þór Ingólfsson formaður VR er kominn í vetrarham, kominn með smá skegg og tilbúinn að semja um kaup og kjör. Það var léttara yfir andlitinu á þingi ASÍ í október þó svo að þingið hafi ekki endað vel.
Guðmundur Birkir Pálmason, eða Gummi kíró eins og hann er kallaður, áhrifavaldur og kírópraktor, er oftast vel rakaður. Hann er hins vegar ekki hræddur við að prófa nýja tísku og það átti við þegar hann skartaði skemmtilegum hökutopp í fyrra.
Borgarstjórinn í Reykjavík, Dagur B. Eggertsson, hefur á undanförnum árum skartað áberandi skeggi. Hann hefur hins vegar ekki alltaf verið með skegg. Í kosningunum árið 2010 var Dagur ekki með skegg. Hárvöxturinn hefur því bara aukist hjá Degi því ekki lítur út fyrir að hann sé að missa hárið eins og menn á hans aldri.
Pólitíkin lék listamanninn Jón Gnarr grátt. Jón hætti sem borgarstjóri árið 2014 en er nú með skegg sem er bæði rautt og grátt. Virðist honum þó líða nokkuð ágætlega með skeggið góða.
Leikarinn og leikstjórinn Baltasar Kormákur hefur skartað skartað miklu skeggi í fjölda ára. Fyrir tveimur áratugum eða svo var hann ekki með skegg eins og sést á mynd sem fannst í myndsafni Morgunblaðsins.
Stjórnmálaforinginn Sigmundur Davíð Gunnlaugsson hefur prófað sig áfram með skeggtískuna. Eins og flestir aðrir hefur hann einnig verið duglegur að raka sig en líður greinilega afar vel með smá einangrun á andlitinu.
Guðmundur Einar Halldórsson er framkvæmdastjóri Gtechniq á Íslandi og er sérfræðingur í að keramíkhúða bíla. Guðmundur er þekktur fyrir sitt föngulega skegg en hann er þó ekki alltaf með það. Dæmi hver fyrir sig hvort fer honum betur.