Hér áður fyrr voru herrar fyrst og fremst að leita eftir vörum sem þeir báru á andlitið eftir rakstur en nú er áhugi orðinn meiri fyrir sérvörum á borð við serum, augnkrem, sólarvörn og litað dagkrem,“ segir Bára Hafsteinsdóttir förðunarfræðingur. Hún bendir á að karlar séu orðnir miklu upplýstari um húðina og það skipti jafnmiklu máli fyrir þá og aðra að bera á sig sólarvörn.
„Við vitum að umhverfisáhrif á borð við mengun, UV-geisla, hitabreytingar, þurrt lofstlag og fleira hafa mikil áhrif á öldrunarferli húðar og því er mikilvægt að vera með krem á daginn sem styrkir varnir húðarinnar gegn þessum áhrifum og hægir þar af leiðandi á öldrunareinkennum.“
Bára mælir með því að blanda rekakremi við BB- eða CC-krem þannig að þekjan verði ekki eins mikil. Að karlinn líti ekki út fyrir að vera farðaður heldur með jafna áferð á húðinni.
„Þeir sem vilja fá mjög náttúrulegt útlit ættu að blanda BB- eða CC-kremi til helminga á móti rakakremi,“ segir hún. Ágæt regla er að blanda þessu saman á handarbakinu áður en blandan er borin á andlitið.
„Fyrir þá herra sem eru kannski ekki endilega að leita eftir kremi fyrir allt andlitið er gullpenninn frá YSL fullkomin lausn. Formúla pennans er mjög létt og blandast fullkomlega svo hún sést ekki á húðinni. Einn smellur af pennanum gefur ljóma og birtu og jafnar litaraft í kringum augu, varir og nef. Einnig má nota formúluna fyrir ofan augabrúnir, á kinnbein, miðju andlits og í kringum varir fyrir jafnari og bjartari áferð,“ segir hún.