Grænar buxnadragtir njóta mikillar hylli meðal konungborinna kvenna þessa dagana. Stutt er síðan Katrín prinsessa af Wales og Viktoría krónprinsessa Svíþjóðar klæddust slíkum drögtum við skyldustörf sín.

Katrín prinsessa, sem þekktust er fyrir að vera í kápukjólum, hefur í síauknum mæli sést í buxnadrögtum. Nú síðast klæddist hún dökkgrænni ullardragt frá Burberry þegar hún heimsótti textílverksmiðjur í Leeds og Lancaster.

Stílistar þar ytra segja að með þessum áherslubreytingum í fatastíl sé prinsessan að gefa til kynna að hún sé tilbúin til þess að axla þá ábyrgð sem fylgir nýrri stöðu hennar sem prinsessa af Wales og sýnir að hún gegnir nú meiri þungavigtarstöðu innan fjölskyldunnar.

Viktoría krónprinsessa Svíþjóðar klæddist einnig grænni dragt í opinberri heimsókn sinni til Finnlands á dögunum. Dragtin er frá finnska merkinu Ril's og þykir það virðingavottur að klæðast hönnun þess lands sem verið er að heimsækja. Annars er vaninn sá að konungborið fólk styðji við hönnunarflóru eigin lands.